მდებარეობა: ასხის მასივი, მდინარე ოკაცეს ხეობა მანძილი: ხონიდან – 13 კმ, ქუთაისიდან – 38 კმ, თბილისიდან – 273 კმ. კოორდინატები: N42 27.079 E42 33.003 რელიეფი: მთაგორიანი. სიმაღლე ზღვის დონიდან: 800 მ. კლიმატი: სუბტროპიკული. ზამთარი რბილი, ზაფხული თბილი, ზომიერად ნოტიო. საშუალო წლიური ტემპერატურა: 17 ℃. ნალექების საშ. წლიური რაოდენობა: 1790 მმ. ჰაერის საშ. წლიური ფარდობითი ტენიანობა: 85%. მზის ნათების ხანგრძლივობა წელიწადში: 2000-2100 სთ. ბუნებრივი სამკურნალო ფაქტორები: დაბალი მთის ჰავა. მკურნალობის სახეობები: კლიმატოთერაპია, ტერენკური. სამკურნალო ჩვენებები: ნერვული და გულ-სისხლ-ძარღვთა სისტემების დაავადებები, საერთო გადაღლა.

გორდი ეგრისის ქედის სამხრეთ კალთებზე, იმერეთის დასავლეთ ნაწილში, სამი მხარის: იმერეთის, სამეგრელოსა და ლეჩხუმის საზღვარზე მდებარეობს. იგი იმერეთის მხარის ერთ-ერთი მშვენებაა. აქ მდებარეობს დადიანების საზაფხულო რეზიდენცია და ყველასათვის ცნობილი გორდის (ოკაცეს) კანიონი.

ჯანსაღი ჰავისა და შესანიშნავი ბუნების წყალობით გორდი გასულ საუკუნეში საქართველოს კლიმატური კურორტების ნუსხაშიც შევიდა. სოფელი გორდი ლეჩხუმსა (ცაგერი) და სამეგრელოს (მარტვილი) ესაზღვრება. სწორედ ამ საზღვარზე გადის კავკასიონის კირქვული ზოლის ფარგლებში ერთ-ერთი ყველაზე ვრცელი და მაღალი მთათა მასივი - ასხი. მისი უმაღლესი წერტილის, გადრეკილის სიმაღლე 2520 მ-ია. მასივზე არსებობს რვა ათეულზე მეტი კარსტული სიღრუე, რომელთა ფართობი 24 ათას კვადრატულ მეტრს აღემატება. მიწის ქვეშეთში 42 მღვიმე, მრავალი ნაკადული, მდინარე და ტბაა. ზოგიერთი მღვიმე ბუნებრივ საყინულეს წარმოადგენს, ზოგიერთის ფსკერზე კი მიწისქვეშა წყლების ნაკადი გაედინება და გარეთ ულამაზეს ჩანჩქერებად გადმოდის. მღვიმეები ერთმანეთს უკავშირდება გვირაბების რთული სისტემით, რომელთა სავარაუდო სიგრძე 15 კმ-ზე მეტია. მასივის ზოგიერთ კარსტულ მღვიმეში ქვის ხანის ადამიანის ადგილსამყოფელი, სხვადასხვა გვარი იარაღი და უძველესი ცხოველების ნაშთები აღმოაჩინეს. უფრო გვიანდელ პერიოდში ბუნებრივი და ადამიანის მიერ გამოკვეთილი მღვიმეები თავშესაფრისა და ციხესიმაგრის ფუნქციას ასრულებდა.

დღეისთვის ასხის მასივი ერთ-ერთი ყველაზე პოპულარული ტურისტული ობიექტია, როგორც იმერეთის, ისე სამეგრელოს რეგიონისთვის.

ასხის მასივიდან სათავეს იღებს მდინარე ოკაცე, რომლიც იმერეთში ყველაზე მაღალ, 70 მეტრი სიმაღლის წყალვარდნილს ქმნის და კინჩხის ტაფობში ეშვება. სოფელ ზემო გორდის მიდამოებში მდინარე აჩენს ბუნების საოცარ ძეგლს - 2-კილომეტრიან კანიონს, რომლის ფსკერზე ბუნებრივი ხიდები, მღვიმეები და ვოკლუზებია განლაგებული. ერთ-ერთ ბუნებრივ ქვის ხიდთან („ქვახიდა“) კანიონის სიღრმე 100 მეტრს აღწევს.

გორდი დადიანების საზაფხულო რეზიდენცია იყო. XIX ს-ში არქიტექტორ ლეონიდ ვასილიევის პროექტით აქ ორი მშვენიერი სასახლე აიგო. სასახლეების ირგვლივ ბაღი იტალიელმა მებაღემ იოსებ ბაბინმა გააშენა. ტყე-პარკში იყო საყდარი, აბანო, გრძელი ხეივნები, წყაროები და ხელოვნური ტბა, სადაც გედები დაცურავდნენ. დღეს მხოლოდ ერთ-ერთი სასახლის უსახურავო კარკასია შემორჩენილი.